Note e Versi Meridiani

Giacinto Gigante, acquarello e tempera su carta, 1865. Napoli, museo Pignatelli

‘A casa nosta è chella

ca dice sempe sì

addò ce può trasì

senza cercà permesso

senza pavà ‘o ‘nteresso.

‘A casa nosta è ‘a sciorta

ca piglia ‘o viento ‘e faccia

c’o sole dint’e braccia

giranno ciento vote

senza cagnà na rota.

‘A casa nosta è fatta

‘e prete abbalurate

‘e suonne spullecate

senza scartà nisciuno

sfamanno chi è diuno.

‘A casa nosta è ‘a vita

ca sbatte int’a sti mane

stipannese ‘o dimane

propio pe’ te cercà

iusto pe’ te truvà.

‘A casa nosta è ‘o bbene

ca nun te lassa maje

ca resta llà addò staie

pecchè te cresce ‘nzino

comme a nu pullecino.

‘A casa nosta è ‘a vrenna

ca dà sapore a ‘o piatto

ca maje te manna ‘o sfratto

e comme tu ce trase

te passa ‘a pecundria

scramanno raso raso:

“Guagliò, sta casa è ‘a mia!”

Pubblicazione de ilportaledelsud.org, luglio 2014