Note e Versi Meridiani

 

 

pagina autore

Ma comme faccio a dì?

(a Pino Daniele)

di Peppe Cassese

 

Ma comme po’ sparì sta voce toia

si l’urdema canzona cerca ancora

‘a voglia ‘e fa scetà chesta città

ca aspetta sempe l’ora ‘e s’abbentà?

 

Sì stato ‘e chesta terra pate e figlio

na vocca ‘e mele e ‘o ffuoco ‘e na chitarra

nu core ca ha schiuppato pe sulià

ca Napule cchiù amara nun ce sta.

 

Ma comme faccio a dì te ne sì gghiuto

si dint’o pietto sona e canta muta

‘a freva ‘e sta quartana speretata

ca sfotte ogne mumento sta nuttata?

 

Sì stato int’a stu cielo luna e stella

na varca ca sbatteva ‘nfaccia ‘o viento

na vita refunnuta a s’appacià

e Napule t’attenne pe parià.

 

Ma comme pozzo scrivere ddoie sciosce

si ‘o tiempo s’è pigliato ‘o meglio amico

e ie ca so’ crisciuto cu sta voce

me ‘nchiovo a chesta smania nova ‘ncroce?

 

Sì stato overamente na ‘mbriana

‘o juorno cchiù abbasato ‘e na semmana

e mo’ ca arape ‘a porta ‘a verità

tu truove finalmente ‘a libertà.

 

Pubblicazione de ilportaledelsud.org, giugno 2015

Centro Culturale e di Studi Storici "Brigantino - il Portale del Sud" - Napoli e Palermo admin@ilportaledelsud.org ®copyright 2015: tutti i diritti riservati. Webmaster: Brigantino.

Sito derattizzato e debossizzato