Partono ‘e bastemiente
pe’ nuie e pe’ tanta ggente
ma ‘o sole pe’ ‘ntramente
nun sape cchiù scarfà
‘e core ‘e sti città.
Partono ‘ndifferente
e ‘o canto nun se sente
e ‘a voce ‘ncoppa a l’onne
‘o chianto s’annasconne
e cerca ‘e arragamà
‘o genio ‘e squaquiglià.
Partono ‘a tutto ’o munno
e spisso vanno ‘nfunno
e l’uocchio se fa sicco
guardanno ‘a prucessione
c’a solita canzone.
Partono e cchiù nun tornano
e cchiù nun schiara juorno
e ‘a notte ca è mappina
se veste ‘a pellerina.
Partono p’a mancanza
partono p’a speranza
e quaccheduno è surdo
e quaccheduno ‘e ‘nzurda
vulenno avè raggione
facenno ‘o scurtecone.
Partono è storia vecchia
‘a solita cufecchia
c’accatta spenne e venne
‘e bracce eppure ‘e penne
‘o sango ‘e chi se sceta
cu ‘ncoppa ‘e spalle ‘e prete
e quanno vò vulà
‘a terra nun ce sta.
Partono ‘e bastemiente
ma ‘o cielo nun’è sente
e areto ‘a verità
chi ‘o sa si è fa’ turnà!
|