|
‘O tiempo passa e va
‘ncopp’a stu munno ‘nfame
assieme a chesta vita
ca comme a margarita
se sfronna a poco a poco
perdenneso cu me
‘mbraccio a stu trentatre.
E ‘o tiempo s’annasconne
‘nzeriuso e ‘ndifferente
areto a chesti lastre
e ‘o poco ca è rimasto
se stuta lento lento
mente na guagliuncella
me fa sentì chiantella.
E ‘o tiempo va sbarianno
‘ncoppìa stu foglio janco
e scrive duie scunniette
senza truvà arriciette
dicenno chianu chiano
“Io voglio alleramente
parià miez’a sta gente”.
E ‘o tiempo mio fernesce
e va ‘nchiudenno ‘a porta
‘nfaccia a sti juorne nire
assieme a te ca crire
e aspiette doce doce
ca doppo a stu straviso
s’arape ‘o paraviso.
|
