Note e Versi Meridiani

Basta cu''e suonne

di Luciano Somma

La poesia letta dall'autore

Tu staje durmenno 'a troppo tiempo ormaje

'mbracci''e canzone, 'o sole, 'a luna, 'o mare,

mentre tenimmo na muntagna 'e guaje

assapuranno 'e lacreme cchiù amare.

 

No, nun se pò campà na sceneggiata

c''o popolo ca è sempe 'o primmo attore

cu' na ferita antica maje sanata

e tante e quante spine dint''o core.

 

Giesù Cristo nascette 'ncopp''a terra

fui mise 'ncroce ma resuscitaie

ma 'sta città sta sempe miez''a guerra

senza truvà nu poco 'e pace, maie.

 

'Ncopp''e disgrazie stanno speculanno

arricamanno ciente e cchiù buscie

stammo dint''a 'mmunnezza ma nun sanno

'o sudore che scorre miez''a via.

 

'O sanghe ca se jette pe' dà 'o ppane

a tanta vocche a stommaco vacante

campanno cu''a speranza 'e nu "Dimane..."

suffrenno 'int''o silenzio comm''e Sante.

 

Basta però chisto è mumento, è ll'ora

tu stai durmenno 'a troppo tiempo e 'o ssaje

è overo ca vulisse durmì ancora

ma è fore tiempo 'o suonno ca te faje.

 

Chitarre, manduline, serenate

so' sulamente na scenografia

sulo ricorde 'e juorne già passate,

Napule, nun se campa 'e fantasia.

 

Levate 'a cuollo 'e panne d''a riggina

e miettete cu''a capa e c''o penziero

a straccià tutte quante 'e ccartuline

ca nun so' cchiù 'o ritratto tuio sincero.

 

E arapele chist'uocchie finalmente

facimmele sta zitto chistu munno

e faticammo dignitosamente

pecchè è fernuta l'epoca d''e suonne.

 

Dal libro di versi di Luciano Somma "N'atu dimane", Edizioni del Delfino Napoli, Giugno 1982. Purtroppo a distanza di oltre 30 anni questi versi sono talmente attuali che sembrano essere scritti oggi.

Centro Culturale e di Studi Storici "Brigantino - il Portale del Sud" - Napoli e Palermo admin@ilportaledelsud.org ®copyright 2011: tutti i diritti riservati. Webmaster: Brigantino.

Sito derattizzato e debossizzato