Zitta,
stanotte nun dicere niente,
cademe 'mbraccia, ma senza parlà...
Dòrmeno 'e ccose nu suonno lucente...
nu suonno 'e 'na notte d'està:
Marì,
dint''o silenzio,
silenzio cantatore,
nun te dico parole d'ammore,
ma t''e ddice 'stu mare pe' me!...
Dimme:
stanotte si' tutta d''a mia?
Ll'uocchie tuoie belle me diceno 'e sì...
No, cu 'sta luna, nisciuna buscia
'sta vocca busciarda pò dì!...
Marì,
dint''o silenzio,
silenzio cantatore,
nun te dico parole d'ammore,
ma t''e ddice 'stu cielo pe' me!...
Cielo,
rispunne! Rispunneme, mare...!
Stelle, pecchè nun vulite parlà?...
Napule, e dimme: Sò ddoce o sò amare
'sti llacreme c'aggia jettà?...
Marì,
dint''o silenzio,
silenzio cantatore,
nun te dico parole d'ammore,
ma t''e ddice 'o silenzio pe' me!...
Zitta,
Marì!... |
